ဟင်္သာတတွင် ကျောင်းသားချင်း ခိုက်ရန်ဖြစ်၊ တဦးသေဆုံး

ဇာနည်မာန်၊ စက်တင်ဘာ ၂၅၊ ၂၀၁၀

ဧရာဝတီတိုင်း ဟင်္သာတမြို့တွင် တက္ကသိုလ် ကျောင်းသားချင်း ခိုက်ရန်ဖြစ်ပွားမှုကြောင့် ယမန်နေ့ညက သေဆုံးသူ ကို အာဏာပိုင်များက ယနေ့သဂြုင်္ိဟ် စေခဲ့ပြီး ဆူပူမှုဖြစ်မည်စိုး၍ လုံခြုံရေးများလည်း ထူထပ်စွာ ချထားကြောင်း သတင်းရရှိ သည်။



ဟင်္သာတ တက္ကသိုလ် ဘူမိဗေဒ ဘာသာရပ် စာမေးပွဲ နောက်ဆုံးနေ့ ညက တက္ကသိုလ် ကျောင်းသူ အဆောင်ရှေ့တွင် သီချင်းဆိုရာမှ ခိုက်ရန်ဖြစ်ပွားခဲ့ပြီး ဓားဒဏ်ရာဖြင့် သေဆုံးသူ ဘူမိဗေဒ ပထမနှစ် ကျောင်းသား မောင်အောင်သူ (၂၂နှစ်) ညောင်ကျိုးရွာ၊ အင်္ဂပူမြို့နယ် ကို ယနေ့နေ့လယ် ၂နာရီတွင် သဂြုင်္ိဟ် ရန် အာဏာပိုင်များက စီစဉ်ခဲ့ခြင်းဖြစ်သည်။

“ကျူးလွန်တဲ့ဘက်က လူကြီးနဲ့ မျက်နှာကြီး အသိုင်းအ၀ိုင်းကဆိုတော့ ပြဿနာ ဖြစ်မှာစိုးလို့ ရဲမင်းကြီးကိုယ်တိုင် ကြီးကြပ်၊ မိသားစုကိုခေါ်ပြီး ဒီနေ့ကို ချက်ချင်း ချလိုက်တာ။ ဓားနဲ့ထိုး၊ ရိုက်တဲ့ ၇ ယောက်ကိုတော့ ဖမ်းထားတယ်။ ဖမ်းထားတဲ့ အထဲ မှာ ဒီမြို့က အထက်တန်းရှေ့နေ တယောက်ရဲ့တူရယ်၊ မြို့မိမြို့ဘ တယောက်ရဲ့မြေးလေးရယ် ပါနေတယ်”ဟု မိသားစုနှင့် နီးစပ်သူတဦးက ဆိုသည်။

မိန်းကလေးဆောင်ရှေ့တွင် ဂစ်တာတီးနေသူများရှေ့မှ သေဆုံးသူ မောင်အောင်သူနှင့် သူငယ်ချင်းများ ဆိုင်ကယ်နှင့် ဖြတ်သွားသည်ကို ဂစ်တာတီးနေသူများက ဆဲဆိုရာမှ ရန်ပွဲ အစပြုခဲ့ပြီး ရိုက်နှက်၍ ဓားများဖြင့် ထိုးခဲ့သောကြောင့် မောင်အောင်သူမှာ နေရာတွင်ပင် သေဆုံးခဲ့ပြီး ၀မ်းဗိုက်တွင် ဒဏ်ရာရရှိသူနှင့် ခါးတွင် ဓားဒဏ်ရာရရှိသူ နှစ်ဦးတို့မှာ ဟင်္သာတ ဆေးရုံ အရေးပေါ်ဌာနတွင် ကုသနေရသည်ဟု သိရသည်။

“ဖြစ်ဖြစ်ချင်းက အောင်သူကို ဒီအတိုင်းခြုံထဲမှာထိုးထားတာ။ ပြီးတော့ ရဲတွေရောက်လာပြီး အဲ့ဒီနေရာတ၀ိုက်ကို ပိတ်ထား လိုက်တော့တာ။ သေချာစစ်ဆေးလား မဆေးလားလည်း ဘာမှ မသိရဘူး၊ ညောင်ကျိုးက သူ့မိသားစုကို ချက်ချင်း အကြောင်း ကြားပြီး ဒီနေ့ သဂြုင်္ိဟ် တာပဲ။ မိဘတွေက ရွာပြန်သယ်ချင်တာလည်း ခွင့်မပေးဘူး”ဟု မိသားစုနှင့် နီးစပ်သူ က ပြောသည်။

သေဆုံးသူကို ဂူသွင်း သဂြုင်္ိဟ်ရန် ဟင်္သာတ ပြည်သူ့ဆေးရုံကြီး ရင်ခွဲရုံမှ တင်းတိုးသုသာန်သို့ သွားရာ လမ်းတလျှောက် တွင်၊ ယာဉ်ထိန်းရဲများ၊ အရပ်ဝတ် ထောက်လှမ်းရေးများ၊ အထူး ရဲတပ်ဖွဲ့ဝင်များ ချထားပြီး တက္ကသိုလ်မှ ဆရာ ဆရာမ များကလည်း လုံခြုံရေး တာဝန်ယူကြရသည်ဟု ၎င်းကပြောဆိုသည်။

ယင်း အမှုကိစ္စနှင့် ပတ်သက်၍ ဟင်္သာတ ရဲစခန်းသို့ ဆက်သွယ်မေးမြန်းခဲ့ရာ တာဝန်ကျ ရဲအရာရှိတဦးက ကျောင်းသား ၇ ဦး ကို ထိန်းသိမ်းထားသည်မှာ ဟုတ်မှန်ကြောင်းနှင့် တရားဥပဒေအတိုင်း ဆောင်ရွက်သွားမည်ဟု ဖြေကြားခဲ့သည်။

“မောင်အောင်သူရဲ့ သူငယ်ချင်းလေးတွေကလည်း မကျေနပ်ကြတာ ဖြစ်နေတော့ ဆူပူမှုတွေ ဖြစ်မှာစိုးလို့ ကျနော်တို့ ရဲတွေရော၊ မယက၊ ရယက အားလုံးက လုံခြုံရေး ယူပေးတဲ့ သဘောပါပဲ။ အခုအခြေအနေကတော့ အေးအေးဆေးဆေး ပါပဲ။ တရားဥပဒေအတိုင်း လုပ်သွားမှာပါ”ဟု အဆိုပါ ရဲ အရာရှိက ပြောသည်။

ဟင်္သာတ မြို့ခံတဦးက“ခရိုင်ရဲမင်းကြီးရော လာတော့ လုံခြုံရေးတွေက အများကြီး၊ ကျောင်းသားချင်းဖြစ်တဲ့ ပြဿနာကို အခုလို ချက်ချင်းကြီး ချ၊ ရဲတွေရော ဘာတွေရော ရှုပ်နေတော့ ကျနော်တို့က ဘာများဖြစ်လဲပေါ့။ ပဲခူးက ကိစ္စလို ဖြစ်တာ မဟုတ်ပေမယ့် လူကြီးအသိုင်းအ၀ိုင်းနဲ့ နီးစပ်သူတွေပါနေတော့ ကျောင်းသားတွေ ဆူမှာ စိုးရိမ်နေပုံရတယ်။ မျှမျှတတ လုပ် မလုပ်ကတော့ စောင့်ကြည့်ရမှာပဲ”ဟု ဆိုသည်။

ပြီးခဲ့သည့် စက်တာဘာ ၄ ရက်နေ့က ပဲခူးမြို့ ဇိုင်းဂနိုင်းရပ်ကွက်တွင် ဖြစ်ပွားခဲ့သော နယ်မြေခံ ခလရ ၅၉ တပ်မှ စစ်သား များနှင့် အရပ်သားလူငယ်များ ခိုက်ရန်ဖြစ်ပွားမှုတွင်လည်း သေဆုံးသူ လူငယ်နှစ်ဦးအား သဂြုင်္ိဟ်ရာတွင် ဆူပူမှု ဖြစ်မည်စိုး ၍ အသုဘ အခမ်းအနားကို လုံခြုံရေး တင်းကျပ်စွာဖြင့် ပြုလုပ်ခဲ့သည်။