အန်အယ်လ်ဒီ နှစ် ၂၀ ပြည့် အခမ်းအနားတွင် ပါတီဝင်တချို့ အဖမ်းခံရ

ကိုသက် | စက်တင်ဘာ ၂၇၊ ၂၀၀၈

ရန်ကုန်မြို့ အန်အယ်လ်ဒီ ဌာနချုပ်တွင်ပြုလုပ်သော ပါတီထူထောင်သည့် အနှစ် ၂၀ ပြည့် အခမ်းအနား၌ အဖွဲ့ဝင် ၉ ဦးကို အာဏာပိုင်တို့က ဖမ်းဆီးလိုက်သည်ဟု အန်အယ်လ်ဒီ သတင်းရပ်ကွက်က ပြောသည်။

ရန်ကုန်တိုင်း ရွှေပြည်သာမြို့နယ်မှ အန်အယ်လ်ဒီ ပါတီဝင်များဖြစ်ကြသည့် မထက်ထက်ဦးဝေ၊ ဒေါ်ရှမ်းမတို့ အပါအ၀င် တခြားပါတီဝင် ၄ ဦးကို အခမ်းအနားမစမီနှင့် နောက်ထပ်ပါတီဝင် ၃ ဦးကို အခမ်းအနားမှအပြန် ပါတီဌာနချုပ်ရှေ့၌ပင် ဖမ်းဆီးခြင်းဖြစ်သည်ဟု အန်အယ်လ်ဒီပါတီ ပြောရေးဆိုခွင့်ရှိသူ ဒေါက်တာဝင်းနိုင်က အတည်ပြု ပြောဆိုသည်။

အဖမ်းခံရသူများအားလုံး၏ အမည်နှင့် ၎င်းတို့နေထိုင်ရာဒေသများကို အသေးစိပ် မသိရသေးပေ။

လုံခြုံရေးများတင်းကျပ်ထားသည့်ကြားက အန်အယ်လ်ဒီ ဌာနချုပ်ရှေ့တွင် ရွှေဝါရောင်တော်လှန်ရေး တနှစ်ပြည့်အထိမ်းအမှတ်အဖြစ် အ၀ါရောင်အင်္ကျီများဝတ်ဆင်ထားသည့် လူငယ်တချို့က သရုပ်ပြ အစီအစဉ်တခုကို ပြုလုပ်ခဲ့ကြသည်။

“အခမ်းအနားမစခင်က ရုံးအရှေ့မှာ ၁၀ ဦးလောက်ရှိတယ်၊ အင်္ကျီအ၀ါတွေဝတ်ပြီး ဆန္ဒပြတဲ့ပုံစံမျိုးပေါ့ … အင်္ကျီအ၀ါဝတ်တယ်ဆိုတာကတော့ ရွှေဝါရောင်တော်လှန်ရေး တနှစ်ပြည့်အထိမ်းအမှတ်ကို ရည်ညွှန်းတဲ့သဘောရှိတယ်” ဟု ဒေါက်တာဝင်းနိုင်က ပြောသည်။

အဆိုပါသရုပ်ပြအစီအစဉ်ကြောင့် ပါတီဝင်တချို့ အဖမ်းခံရသည်ဟုလည်း ယူဆရကြောင်း ၎င်းကဆိုသည်။

“အရင်တုန်းက အခမ်းအနားတွေလုပ်တိုင်း ရုံးရှေ့မှာ ချိုးငှက်တွေလွှတ်ပြီး ဆန္ဒပြတဲ့ပုံစံလေးတွေလုပ်တယ် .. ၅ မိနစ်လောက်ပေါ့၊ အဲဒီပွဲတွေမှာ မထက်ထက်ဦးဝေတို့က အမြဲတမ်းပါတယ်။ ဒါကြောင့်မို့ မထက်ထက်ဦးဝေတို့ကို လုပ်နေကျလူတွေလို့ယူဆပြီး ကားပေါ်ကဆင်းတာနဲ့ ဖမ်းသွားတာ ဖြစ်မယ်” ဟု ဒေါက်တာဝင်းနိုင်က ပြောသည်။

မထက်က်ဦးဝေသည် ရွှေပြည်သာမြို့နယ် အန်အယ်လ်ဒီ အမျိုးသမီးအဖွဲ့ခေါင်းဆောင်ဖြစ်ပြီး ဒေါ်ရှမ်းမသည် ရွှေပြည်သာမြို့နယ် အတွင်းရေးမှူး ဖြစ်သည်။

အနှစ် ၂၀ ပြည့် အခမ်းအနားပြုလုပ်နေချိန်တွင် လုံထိန်းကား ၅ စီးခန့်၊ စွမ်းအားရှင်များ၏ကား ၅ စီးခန့်၊ ၀ါရာလက်စ်ကားများ၊ အခြေအနေကိုကွပ်ကဲနေသည့် အရာရှိများနှင့် လန်ခရုဇာကားများ အန်အယ်လ်ဒီ ဌာနချုပ်ရှေ့အနီးတွင်ရပ်ကာ လုံခြုံရေးယူထားကြောင်း သိရသည်။

“ဘာအပြစ်မှမရှိ၊ ဘာမှမလုပ်ရဘဲ ဖမ်းတာကတော့ ဥပဒေမဲ့ ဖမ်းတာပဲ၊ ဒါမျိုး မဖြစ်သင့်ဘူး။ တိုင်းပြည်မှာ တကယ်ကို အကြပ်အတည်းတွေနဲ့ကြုံပြီး အချင်းချင်း ပြန်လည်သွေးစည်းညီညွတ်ရမယ့်အချိန်၊ တွေ့ဆုံဆွေးနွေးရမယ့် အချိန်မျိုးမှာ ဒီလို ဖမ်းတာဆီးတာ၊ ရိုက်နှက်တာတွေဟာ တိုင်းပြည်အတွက် ဘာမှဖြစ်လာမှာ မဟုတ်ဘူး” ဟု ဒေါက်တာဝင်းနိုင်က သုံးသပ်ပြောဆိုသည်။